Prapaskenat/ Vuçiç ia merr “zemrën” me lule, Von Der Leyen premton para në Serbi

Serbia e priti ëmbël presidenten e Komisionit Europian gjatë ndalesës së saj në Beograd në turin Ballkanik.

Presidenti Aleksandër Vuçiç i dhuroi lule Ursula von der Leyen, e cila më pas i premtoi 6 miliardë euro investime dhe 20 mijë vende të reja pune.

Lideri serb tregoi në konferencën e përbashkët për shtyp se i ka folur presidentes së Komisionit Europian për Kosovën dhe i ka treguar planin e tij.

“Prezantova në mënyrë të detajuar dhe të plotë qëndrimin e Serbisë dhe fola në detaje dhe tërësisht për domosdoshmërinë e kompromisit, bisedimeve dhe të ardhmes së të gjithë rajonit”, tha Vuçiç.

Presidentja e Komisionit Europian foli për sfidën mes Brukselit dhe Moskës për të marrë në gjirin e tyre Beogradin, duke theksuar besim të plotë se Serbia ka zgjedhur BE-në dhe jo BRICS-in e Rusisë.