“Na tregonte shenjat e dhunës” / Dëshmia tronditëse e kushërirës së shqiptares që u vra nga bashkëshorti në Greqi!

Të tjera detaje kanë dalë në dritë pas vrasjes së shqiptares Esma Meço, nga bashkëshorti i saj. Në një intervistë për mediat greke, një kushërirë e viktimës ka treguar se të afërimit e dinin që 44-vjeçarja abuzohej nga bashkëshorti. Madje sipas saj Esma i kishte treguar edhe foto ku dukeshin shenjat e dhunës.

"Ne e dinim që ai po e abuzonte. I kishim sugjeruar shumë herë që ajo të vinte të qëndronte me ne. Ajo na kishte treguar shpesh foto të shenjave nga dhuna e ushtruar", thotë kushërira e 44-vjeçares.

Sipas saj, të afërmit ishin përpjekur vazhdimisht ta bindnin 44-vjeçaren të largohej nga shtëpia dhe të qëndronte me ta. Megjithatë, ajo pretendon se 53-vjeçari e kishte kërcënuar dhe i kishte kufizuar komunikimin me familjen dhe miqtë e saj.

Ai e kërcënoi dhe nuk e linte të fliste me ne. Ne flisnim fshehurazi në telefon ", shton ajo.

44-vjeçarja u kishte treguar njerëzve të rrethit të saj të ngushtë se bashkëshorti ishte patologjikisht xheloz ndaj saj. Madje, në të kaluarën, gruaja dyshohet se kishte kërkuar edhe shtrimin e tij në spital.

Shqiptarja punonte sezonalisht në ishullin e Thasos dhe ishte kthyer në Rodopi për të kaluar kohë me fëmijët e saj. Vrasja ndodhi mesditën e së mërkurës, kur 53-vjeçari e goditi me thikë në qafë gruan 44-vjeçare , ndërsa vajza e saj 16-vjeçare dhe djali i tyre 19-vjeçar ishin brenda në shtëpi në atë kohë.

E mitura pa nënën të vdiste para syve të saj, ndërsa 19-vjeçari ishte ai që e mori në krahë dhe e çoi në spital për të mos humbur kohë. Megjithatë, ajo nuk mundi t'i mbijetojë plagëve të marra.

Pas vrasjes, Bujar Meço tentoi t'i jepte fund jetës duke pirë benzinë. Ai u transportua në spital, ku iu nënshtrua një ndërhyrjeje kirurgjikale. Pasi doli nga reanimacioni, autoritetet greke e arrestuan zyrtarisht, ndërsa ai vijon të ruhet nga policia në spital. Paraprakisht dyshohet se shkak i vrasjes ishte xhelozia, ndërsa 44-vjeçarja kishte nisur procedurat për t'u divorcuar.