Djegia e spitalit Covid në Tetovë, koordinatori: Çdo gjë ndodhi për 3-5 minuta, nuk ia dolëm…

Dy ditë pas tragjedisë në Tetovë, ka folur koordinatori i Qendrës Covid-19, Gazim Nuredini. Për mediat ai tha se vendi u dogj për 3-5 minuta, duke e bërë të pamundur shpëtimin e të gjithë pacientëve. Sipas tij e gjithë kjo ngjarje tragjike është e habitshme, ndërsa tha se pritet për ekspertizën.

“Gjithçka zgjati 3-5 minuta. Ekipet mjekësore, stafi dhe njerëzit që ishin jashtë, të afërmit që donin të komunikonin me ne ata të gjithë ndihmuan dhe gjithçka ndodhi në 3 minuta. Vetëm ata 12 pacientë mbijetuan gjatë asaj kohe. Të tjerët nuk patën sukses sepse flakët mbuluan të gjithë hapësirën në 3 minuta.

Ishte e çuditshme për mua …nëse do të ishte dru i thatë nuk do të digjej në një kohë kaq të shkurtër, por le të shohim se çfarë do të thonë ekspertët”, tha Nuredini.

Tragjedia ndodhi në orën 21:00 të së mërkurës, ku spitali Covid-19 u dogj e për pasojë ndërruan jetën 14 pacientë dhe u shpëtuan 12 prej tyre.