Aksident i rëndë në Skënderaj, humb jetën një fëmijë

Një aksident i rëndë trafiku i ndodhur më 24 korrik në Skënderaj të Kosovës ka rezultuar fatal për një fëmijë, i cili ndërroi jetë pas disa ditësh në spital.

Sipas raportit 24-orësh të Policisë së Kosovës, aksidenti ka ndodhur mes dy automjeteve të drejtuara nga meshkuj, njëri shtetas i huaj dhe tjetri kosovar. Si pasojë, u lënduan gjashtë persona – tri femra dhe tri meshkuj, të gjithë shtetas kosovarë.

Pavarësisht ndërhyrjes mjekësore, mjeku kujdestar konfirmoi vdekjen e njërit prej të plagosurve, një fëmijë. Trupi i viktimës është dërguar në Institutin e Mjekësisë Ligjore për kryerjen e obduksionit.

Hetimet për zbardhjen e plotë të rrethanave të ngjarjes vijojnë.