"Kur nuk dëgjohen..."/ Eurodeputeti bullgar për protestat në Tiranë: Të mbrohen të rinjtë që sfidojnë pushtetin

Eurodeputeti bullgar Andrey Kovatchev ka reaguar në lidhje me situatën në Shqipëri, nëpërmjet një postimi në platformën X. 

Kovatchev, i cili ka qenë dhe raportuesi i PE-së për raportet e progresit për Shqipërinë në 2023 dhe 2024, shkroi sot se të rinjtë shqiptarë kërkojnë më shumë se sa premtime. 

Ai u shpreh kundër dhunës në protesta, ndërsa theksoi se liria e tubimit dhe e shprehjes duhet të ushtrohet në mënyrë paqësore. 

Reagimi i Kovatchev:

Rinia e Shqipërisë kërkon më shumë se premtime: duan llogaridhënie, fund të korrupsionit dhe një të ardhme europiane të ndërtuar mbi demokracinë dhe shtetin e së drejtës.

Zërat e tyre duhet të dëgjohen, shqetësimet e tyre të merren seriozisht dhe e drejta e tyre për të sfiduar në mënyrë paqësore ata që janë në pushtet duhet të mbrohet.

Liria e tubimit dhe e shprehjes duhet të ushtrohet në mënyrë paqësore. Dhuna është e papranueshme, qoftë nga protestuesit apo nga forcat e rendit, dhe të gjitha pretendimet duhet të hetohen me proces të rregullt dhe me llogaridhënie.

 Europa dëshiron të mirëpresë një Shqipëri të përkushtuar ndaj vlerave tona europiane.