E rëndë në Roskovec, plumba para portës së banesës, 22-vjeçarja denoncon ish-bashkëshortin: Na kërcënon me jetë

Një ngjarje shqetësuese është regjistruar në fshatin Luar të Roskovecit, ku një 37-vjeçar është arrestuar nën dyshimin se ka qëlluar me armë zjarri pranë banesës së ish-bashkëshortes së tij, 22-vjeçares Aleksandra Elmazaj.

E reja ka rrëfyer për mediat momentet e frikshme të natës, kur ndodhej në shtëpi me motrën dhe vajzën e saj të mitur. Sipas dëshmisë së saj, rreth orës 00:48, familjarët dëgjuan të shtëna armësh, por nuk dolën jashtë nga frika.

Vetëm në mëngjes, pranë portës së banesës, 22-vjeçarja gjeti katër gëzhoja, pas së cilave njoftoi menjëherë policinë.

“Kemi një vajzë, ai më kërcënon mua dhe të dashurin tim”, ka deklaruar e reja, duke treguar se dyshimet e saj janë përqendruar te ish-bashkëshorti, Besmir Mustaj.

Sipas saj, çifti i kishte dhënë fund martesës pas pesë vitesh dhe kujdestaria e vajzës së mitur i ishte lënë asaj. Pas ndarjes, pretendon 22-vjeçarja, ish-partneri kishte vijuar ta shqetësonte dhe ta kërcënonte, si përmes telefonit, ashtu edhe duke u paraqitur pranë banesës.

E reja ka bërë të ditur se disa muaj më parë kishte kërkuar ndihmën e policisë dhe ishte pajisur me urdhër mbrojtjeje.

Ajo pretendon gjithashtu se konfliktet janë përshkallëzuar pas nisjes së një lidhjeje të re. Sipas dëshmisë së saj, ish-bashkëshorti ka shkuar edhe te banesa e partnerit të saj aktual, duke i kërkuar të largohej prej saj.

“Kam bërë denoncim në polici para dy-tre muajsh. Jam me urdhër mbrojtjeje. Tani jam në një lidhje tjetër dhe ai e ka kërcënuar edhe partnerin tim”, ka treguar 22-vjeçarja.

E frikësuar për sigurinë e saj dhe të vajzës, ajo i ka kërkuar autoriteteve të marrin masa për të parandaluar përshkallëzimin e mëtejshëm të situatës.

Ndërkohë, policia ka arrestuar 37-vjeçarin Besmir Mustaj. Sipas të dhënave të bëra publike, ai dyshohet për veprat penale që lidhen me mbajtjen e armëve dhe municionit pa leje, dhunën në familje dhe veprimet në kundërshtim me vendimin e gjykatës.

Hetimet për ngjarjen vijojnë, ndërsa pretendimet e ngritura ndaj të arrestuarit mbeten objekt i procedurave ligjore.