VIDEO/ Shpërthim i fuqishëm në Siri, raportohet për dy të vrarë dhe 70 të plagosur

Një shpërthim i fuqishëm goditi qytetin Maarrat Misrin në provincën veriore të Idlibit, Siri, këtë të enjte, duke shkaktuar vdekjen e të paktën dy personave dhe plagosjen e mbi 70 të tjerëve, sipas raportimeve të mediave lokale dhe agjencisë shtetërore siriane të lajmeve, SANA.

Ministri i Emergjencave dhe Menaxhimit të Fatkeqësive i Sirisë, Raed Al-Saleh, bëri të ditur në një postim në rrjetin social “X” se ekipet e Mbrojtjes Civile kanë ndërhyrë menjëherë në vendin e ngjarjes për të kryer operacione evakuimi dhe shpëtimi.

Sipas tij, operacionet po zhvillohen në kushte jashtëzakonisht të rrezikshme për shkak të shpërthimeve dytësore që vazhdojnë në zonë. Ai shtoi se numri përfundimtar i viktimave ende nuk është konfirmuar dhe u bëri thirrje qytetarëve të shmangin zonën për arsye sigurie.

Shkaku i shpërthimit mbetet i panjohur, ndërsa autoritetet po hetojnë rrethanat e incidentit. Rajoni i Idlibit, një nga zonat më të ndërlikuara të konfliktit sirian, ka qenë shpesh skenë e sulmeve të armatosura dhe bombardimeve për shkak të pranisë së grupeve të armatosura dhe interesave të ndryshme gjeopolitike.