TMERR – Çifti dënohet me 100 goditje me kamzhik për tradhti bashkëshortore, gruaja...

Një çift është dënuar me nga 100 goditje me kamxhik në Banda Aceh të Indonezisë, pasi u shpallën fajtorë për marrëdhënie seksuale jashtë martesës, në një nga rastet më të rënda të zbatimit publik të ligjit të Sheriatit në provincën e Aceh-ut.

Sipas raportimeve të mediave ndërkombëtare, gruaja nuk mundi ta përballonte dhimbjen gjatë ekzekutimit të dënimit dhe u pa duke kërkuar mëshirë përpara se të rrëzohej në tokë. Ajo u ndihmua më pas nga autoritetet për t’u ngritur.

Edhe burri pati probleme gjatë ekzekutimit të dënimit. Pas 60 goditjeve, ndëshkimi u ndërpre përkohësisht për shkak të gjendjes së tij fizike, përpara se të rifillonte dhe të përfundonte me 100 goditje.

Aceh është e vetmja provincë e Indonezisë që zbaton në mënyrë formale ligjin islam të Sheriatit.

Ndëshkimi me kamxhik parashikohet për disa shkelje, përfshirë marrëdhëniet seksuale jashtë martesës, bixhozin dhe konsumimin e alkoolit.

Çifti ishte mes 10 personave të ndëshkuar publikisht atë ditë. Tetë personat e tjerë morën nga 16 deri në 21 goditje, pasi u shpallën fajtorë për përzierje mes burrave dhe grave gjatë një feste ditëlindjeje.

Ekzekutimet publike të këtyre dënimeve në Aceh zhvillohen zakonisht në ambiente të hapura dhe ndiqen nga qytetarë, duke e bërë ndëshkimin jo vetëm fizik, por edhe publik.