Talebanët shpallin fitoren në Panjshir, lideri i rebelëve: Po i furnizojnë me armë ndërkombëtarët!

Talebanët kanë shpallur fitoren ndaj provincës së “padepërtueshme” Panjshir në verilindje të Kabulit, i cili ishte i vetmi territor i pazaptuar deri më tani.

Grupi i luftëtarëve kanë publikuar një video në rrjetet e tyre sociale duke ngritur flamurin e tyre në këtë rajon, çka simbolizon fitore.

Por luftëtarët e provincës, shprehen për mediat botërore se ende nuk janë larguar plotësisht nga rajoni. Sipas tyre, ata janë grupuar në pika strategjike të luginës dhe do të vijojnë luftimet.

Lideri i tyre, Ahmad Massoud ka shpallur luftë të hapur kundër talebanëve. Madje ai hedh akuza dhe ndaj shteteve të tjera të cilët kanë legjitimuar qeverinë e re afgane.

Në një audio regjistrim të publikuar në rrjete sociale, lideri i luftëtarëvëe të Rezistencës kombëtare në Panjshir thotë se komuniteti ndërkombëtar po furnizon me armë talebanët dhe po i mbështet ata politikisht.

“Ju bëj thirrje të gjithëve, qoftë brenda Afganistanit ose jashtë, të ngrihemi kundër talebanëve dhe të ruajmë dinjitetin dhe lirinë e shtetit tonë” – është shprehur Massoud.