Stoltenberg: SHBA e përkushtuar ndaj NATO-s edhe nëse fiton Trump

Sekretari i Përgjithshëm i NATO-s, Stoltenberg ka deklaruar se edhe nëse Trump kthehet në krye të Shtëpisë së Bardhë, SHBA-të mbeten aleate të perkushtuara të aleances. Për sa i përket deklaratave të Trump se nuk do të mbrojë vendet anëtare nëse nuk paguajnë detyrimet, Stoltenberg tha se aleanca ka përparuar në krahasim me vitet e mëparshme në këtë drejtim.

“Të dhënat e reja tregojnë se çdo vit e më shumë aleatë të NATO-s po e plotësojnë detyrimin e shpenzimit të 2 për qind të GDP-së për mbrojtjen, dhe kjo tregon se aleanca ka shënuar përparim të madh prej vitit 2014 , kur u zotua për këtë. Vetëm tri vende anëtare të NATO-s shpenzonin 2 për qind të GDP-së për mbrojtjen, tani janë 18”, tha Stoltenberg.

Kreu i NATO theksoi se vdekja e politikanit opozitar rus, Alexei Navalny duhet të ndikojë për të rritur edhe më shumë mbështetjen ndaj Ukrainës në perballimin e agresionit.

“Unë besoj fuqishëm se mënyra më e mirë për ta nderuar kujtimin e Alexei Navalnyt është të sigurohemi se presidenti Putin nuk fiton në fushëbetejë, por që Ukraina të triumfojë”, tha Stoltenberg.

Lideri i opozitës Aleksei Navalny humbi jetën në një burg të Rusisë dhe rrethanat janë ende të paqarta.