Starmer: Ekonomia nuk kthehet në normalitet, edhe pas rihapjes së Ngushticës së Hormuzit

Kryeministri britanik Keir Starmer ka deklaruar se ekonomia e Mbretërisë së Bashkuar nuk do të rikthehet shpejt në normalitet, edhe nëse situata në Ngushticën e Hormuzit stabilizohet.

Në një intervistë për BBC Radio 4, ai tha se vendi duhet të ndryshojë kurs dhe të mos kthehet në “status quo”-në e mëparshme, të cilën e cilësoi si të dështuar pas krizave të viteve të fundit, përfshirë krizën financiare të vitit 2008 dhe pandeminë e COVID-19.

Sipas Starmer, presionet ekonomike, përfshirë rritjen e inflacionit, janë të pashmangshme në një situatë globale të ndërlikuar që ndikohet nga tensionet gjeopolitike dhe krizat energjetike.

Ai theksoi se qeveria britanike po punon për një zgjidhje ndërkombëtare lidhur me Ngushticën e Hormuzit, në bashkëpunim me Francën dhe partnerë të tjerë, por paralajmëroi se edhe pas një marrëveshjeje të mundshme, stabiliteti ekonomik nuk do të rikthehet menjëherë.

Starmer shtoi se zhvillimet globale, përfshirë luftën në Ukrainë, tregojnë një botë gjithnjë e më të paqëndrueshme dhe me sfida të vazhdueshme ekonomike e politike.