Si u shpëtoi sulmeve që vranë të atin? Zyrtari iranian: Khamenei ndodhej në të njëjtën ndërtesë, por…

Autoritetet iraniane kanë reaguar ndaj raportimeve për gjendjen e udhëheqësit të ri suprem, Mojtaba Khamenei, i cili prej disa javësh nuk është shfaqur në publik.

Sipas zyrtarëve të cituar nga media shtetërore, përfshirë Agjencinë Fars, Khamenei ndodhej në një ndërtesë që u godit gjatë një sulmi ku humbi jetën babai dhe paraardhësi i tij, Ali Khamenei, por ai arriti të largohej pak para ngjarjes.

Zyrtari iranian Mohsen Qomi deklaroi se largimi i tij nga vendi i ngjarjes ndodhi “rastësisht ose me vullnet hyjnor”, duke shtuar se ai i ka shpëtuar sulmit dhe nuk u prek.

Pavarësisht mungesës së tij në daljet publike, autoritetet këmbëngulin se Mojtaba Khamenei është në gjendje të mirë shëndetësore dhe po ushtron detyrat e tij.

Ndërkohë, ai ka lëshuar një deklaratë të re që është lexuar në televizionin shtetëror, ndërsa mungesa e tij e zgjatur në publik vazhdon të ngjallë spekulime dhe reagime ndërkombëtare.