SHBA jep shpërblim 5 mln dollarë për kokën e tij, kush është ministri i ri i Brendshëm i Afganistanit

Sarajuddin Haqqani, Ministri i ri i Brendshëm i qeverisë talebane në Afganistan, është vendosur në listën e personave më të kërkuar në SHBA.

Haqqani është kreu i grupit militantik të njohur si rrjeti Haqqani, të cilët janë të lidhur me talebanët dhe kanë qenë pas disa prej sulmeve më vdekjeprurëse në luftën 20-vjeçare të vendit.

Departamenti Amerikan i Shtetit aktualisht po ofron një shpërblim prej 5 milion dollarësh (3.6 milion £) për informacionin që çon drejtpërdrejt në arrestimin e Haqqani.

Pas vdekjes së babait të tij, Jalaluddin Haqqani, ai u bë udhëheqësi i ri i rrjetit, i cili aktualisht është një nga grupet militante më të fuqishme dhe më të frikshme të rajonit. Disa thonë se është edhe më me ndikim sesa grupi i Shtetit Islamik në Afganistan.

Grupi, i caktuar nga SHBA si një organizatë terroriste, mbikëqyr pasuritë financiare dhe ushtarake të talebanëve përgjatë kufirit Pakistan-Afganistan. Haqqani besohet të jetë rreth 45 vjeç.

Në një artikull të New York Times vitin e kaluar para nënshkrimit të marrëveshjes së Dohas, Haqqani shkroi: “Për më shumë se katër dekada, jetë të çmuara afgane janë humbur çdo ditë. Të gjithë kanë humbur dikë që e donin. Të gjithë janë lodhur nga lufta. Unë jam i bindur se vrasja dhe gjymtimi duhet të ndalet “.