SHBA/ E mori në makinë për ta ndihmuar, babai i tre fëmijëve vritet me plumb në kokë nga e panjohura

Një tragjedi e rëndë ndodhi në Missouri, SHBA, ku një baba tre fëmijësh, William Palmer, u vra pasi pranoi të merrte në makinë një grua që e kishte ndalur në një stacion karburanti dhe i kërkoi ndihmë, duke thënë se kishte ftohtë. Viktima, e cila ishte duke mbledhur metale të vjetra në momentin e ngjarjes, nuk dyshoi se ndihma e tij do të përfundonte tragjikisht.

Gruaja, 36-vjeçarja Brittany Rivoire, e cila kishte qenë e arrestuar më parë në 2024 për vjedhje makine, e qëlloi Palmerin në kokë dhe i mori makinën, që më pas e braktisi.

E fejuara e Palmerit, Regen Jones, tha se ai kishte pranuar të ndihmonte gruan në mënyrë që ajo të shkonte në një vend të ngrohtë. Familjarët e tij theksuan se Palmer ishte i njohur për sjelljen e tij bujare ndaj të panjohurve.

Një prej tyre tha: “I thosha gjithmonë të mos merrte njerëz nga rruga, por ai e bënte shpesh. Nëse shihte dikë duke ecur, e merrte dhe e çonte sa më larg që mundej.”

Pas arrestimit, Rivoire akuzohet për vrasje në shkallën e parë dhe mbajtje të paligjshme të armës së zjarrit.