Pas 27 vitesh punë, largohet nga Amazon Jeff Bezos

Jeff Bezos, një nga njerëzit më të pasur në botë, po largohet nga Amazon, duke lënë një trashëgimi të qëndrueshme pasi e nisi me shitje librash në internet nga një garazh në Seattle dhe shndërroi projektin e tij në një nga korporatat më të fuqishme të botës. 57-vjeçari njoftoi në shkurt se do të largohej si CEO i Amazon në tremujorin e tretë të këtij viti.Agjencitë e huaja raportuan se pronari dhe themeluesi i kompanisë do t’ia linte luftën me punëtorë të pakënaqur pasardhësit të tij Andy Jassy, ​​për të pasur më shumë kohë për filantropi, redaktim gazetash dhe duele hapësinore me Elon Musk, njeriu që e dëboi atë nga pozita e njeriu më i pasur në botë në fillim të këtij viti.

Ai, megjithatë, do të mbajë një nga rolet kryesore në departamentet e teknologjisë dhe shitjeve elektronike në atë gjigand biznesi, të cilin ai e nisi 27 vjet më parë. Për 20 korrik, Bezos njoftoi gjithashtu një udhëtim në hapësirë. Pas largimit nga detyra si CEO dhe menaxhim i përditshëm i Amazon, Bezos do të përqendrohet më shumë në kompaninë e tij të eksplorimit hapësinor Blue Origin.

Ai pretendon se dëshiron t’i kushtojë gjithnjë e më shumë luftës kundër ndryshimit të klimës, por aktualisht, pas raporteve të mediave, ai po përballet me kritika se nuk ka paguar taksë mbi të ardhurat për disa vjet.