Një kompani pushon nga puna të gjithë punonjësit e saj në Venecia, i zëvendëson nga inteligjenca artificiale

InvestCloud Italy, me seli në Marghera (Venecia), ka nisur procesin e shkarkimit kolektiv të 37 punonjësve të saj për shkak të mbylljes së zyrës së saj në Venecia, e vetmja në Itali.

Për këtë ka shkruar sot gazeta La Nuova di Venezia e Mestre.

Kompania e teknologjisë financiare ia komunikoi vendimin e saj Federmeccanica-s, sindikatave dhe Confindustria Veneto Est, duke përmendur modelin e ri organizativ të grupit amerikan, bazuar në sisteme të integruara me inteligjencën artificiale, e cila “nuk kërkon mirëmbajtjen e strukturave autonome lokale”.

37 shkurtimet e vendeve të punës janë pjesë e një procesi transformimi brenda grupit InvestCloud të nisur gjatë 18 muajve të fundit. Në një letër drejtuar partnerëve socialë, kompania shpjegon se struktura aktuale e biznesit, “e zhvilluar me kalimin e kohës sipas një modeli që është shumë i shpërndarë në vende të ndryshme anembanë botës dhe pjesërisht i bazuar në zgjidhje të adaptuara në nivel lokal, nuk është më e pajtueshme me qëllimin e krijimit të një platforme të integruar teknologjike të përqendruar në zgjidhje të bazuara në inteligjencën artificiale”.

Një takim i punëtorëve është planifikuar për ditët në vijim për të vlerësuar kuadrin rregullator për kundërshtimin e vendimit, përfshirë edhe përmes komitetit të menaxhimit të krizave të Rajonit Veneto