Lufta në Ukrainë drejt fundit? Putin i gatshëm të takohet me Zelenskyn: Të negociojmë për t’i dhënë fund

Në ditën e 1,212 të luftës në Ukrainë, Presidenti rus Vladimir Putin ka dhënë sinjale për një hapje të mundshme drejt negociatave për paqe, por vetëm me kushte të qarta dhe specifike nga ana e Rusisë.

Gjatë një takimi me drejtuesit e disa prej agjencive kryesore ndërkombëtare të lajmeve, Putin deklaroi se nuk e konsideron riarmatosjen e NATO-s si një kërcënim të drejtpërdrejtë për Rusinë, duke zbutur përkohësisht retorikën e zakonshme ndaj Perëndimit.

Në fokus të deklaratës së tij ishte edhe një mundësi për takim me Presidentin ukrainas Volodymyr Zelensky. Por, sipas Putinit, ky takim mund të ndodhë vetëm në fazën përfundimtare të një procesi negociatash – për të përmbyllur luftën. Megjithatë, ai ngriti një pikëpyetje të fortë për legjitimitetin e liderit ukrainas, duke theksuar se mandati i Zelensky ka përfunduar në maj 2024, ndërkohë që zgjedhjet në Ukrainë janë shtyrë për shkak të ligjit ushtarak.

“Pyetja është kush do ta nënshkruajë marrëveshjen,” u shpreh Putin, duke sugjeruar se çdo dokument i mundshëm paqeje mund të vihet në diskutim nëse firmoset nga një president që Rusia nuk e konsideron legjitim.

Nga ana tjetër, tensionet nuk janë më vetëm në fushëbetejat tradicionale. Ukraina shpreh shqetësim për zgjerimin e pranisë ushtarake ruse në Arktik. Sipas Andriy Chernyak, zëdhënës i Drejtorisë Kryesore të Inteligjencës në Ministrinë e Mbrojtjes së Ukrainës, Rusia po forcon pozitat në këtë rajon strategjik, i cili ka rëndësi të veçantë për kontrollin e burimeve natyrore dhe për aksesin në rrugët e reja detare.

Tensionet mes dy vendeve mbeten të larta, ndërsa bota pret të shohë nëse fjalët e Putinit do të përkthehen në hapa konkretë drejt paqes.