Kapen 100 kg kokainë në Spanjë, 12 arrestime, mes tyre edhe shqiptarë. Droga me avion nga Ekuadori, "kokat” në Dubai

Policia e Spanjës sekuestroi 100 kilogramë kokainë në një kontejner që vinte nga Ekuadori.

Ministria e Brendshme e Spanjës thotë se në operacion u arrestuan 12 anëtarë të grupit kriminal, një nga më aktivët në Evropë dhe Amerikën e Jugut, i përbërë nga shtetas shqiptarë, kolumbianë, marokenë dhe evropianë.

“Organizata kishte kontakte të drejtpërdrejta në vendet kryesore të shitjes së kokainës, si Kolumbia dhe Ekuador, dhe me investitorë të fortë që banonin në Dubai.

Droga, e cila ishte sjellë në Spanjë nga ajri, u gjet brenda një magazine në Fuenlabrada, ku ishte depozituar nga anëtarët e organizatës”, thotë ministria e Brendshme.

Hetimi ka nisur në fillim të vitit 2023, kur agjentët e Policisë Kombëtare nisën të hetonin një organizatë kriminale ndërkombëtare, me bazë në Costa del Sol dhe të përbërë nga shtetas të Shqipërisë, Kolumbisë, Marokut dhe Suedisë.

Anëtarët e grupit kishin kontakte të drejtpërdrejta në qendrat kryesore aktuale të trafikut ndërkombëtar të drogës, si në Kolumbi, Ekuador dhe Dubai.

Kjo organizatë kriminale i dedikohej eksportit të sasive të mëdha të kokainës nga Amerika e Jugut në Evropë, si nga ajri ashtu edhe nga deti.

Pas hetimeve, agjentët arritën të lokalizojnë anëtarët e rrjetit kriminal në Costa del Sol dhe Madrid. Përveç kësaj, ata zbuluan një mori takimesh mes tyre për të përgatitur dërgesat e substancave narkotike nga Amerika e Jugut në Spanjë.

Nga ana tjetër, u konstatua se ata kryenin udhëtime në vende të tjera, përfshirë Dubain, ku ndodheshin investitorët kryesorë të grupit kriminal dhe u dhanë udhëzime pjesës tjetër të anëtarëve për të kryer biznesin e paligjshëm.