“Irani nuk mund të ketë armë bërthamore”, Trump flet për negociatat në Doha me Teheranin: Shpejt do të kemi rezultate

Donald Trump ka deklaruar se negociatat indirekte mes Shtetet e Bashkuara të Amerikës dhe Iranit po zhvillohen në mënyrë pozitive, duke theksuar se bisedimet në Doha “po shkojnë shumë mirë”.

Gjatë një prononcimi për gazetarët në Bazën e Përbashkët Andrews, Trump u shpreh se Teherani ka ndryshuar ndjeshëm qëndrimin e tij në raport me negociatat.

“Irani ka bërë shumë përparim”, deklaroi ai, ndërsa rikujtoi edhe goditjet e fundit amerikane ndaj objektivave iraniane, duke shtuar se “ne i goditëm shumë fort javën e kaluar”.

Presidenti amerikan përsëriti gjithashtu qëndrimin e Uashingtonit lidhur me programin bërthamor iranian, duke theksuar se Irani nuk duhet të pajiset me armë bërthamore.

Nga ana tjetër, presidenti iranian Masoud Pezeshkian deklaroi se marrëveshjet dhe negociatat e fundit kanë nisur të japin efekte konkrete për ekonominë iraniane.

Sipas agjencisë gjysmëzyrtare Fars News Agency, Pezeshkian tha se disa kufizime financiare dhe monetare janë lehtësuar, ndërsa eksportet e naftës dhe mundësitë për bashkëpunim ekonomik janë zgjeruar.

Mediat ndërkombëtare raportojnë se në bisedimet që po zhvillohen në Doha është arritur një marrëveshje paraprake për lirimin e rreth 3 miliardë dollarëve për Teheranin.

Negociatat po zhvillohen me ndërmjetësimin e Katarit dhe Pakistanit, ndërsa në tryezë mbetet edhe çështja e statusit të Ngushticës së Hormuzit, bazuar në një propozim të ri të paraqitur nga Omani.

Sipas burimeve diplomatike, delegacionet pritet të rikthehen në vendet e tyre për konsultime të mëtejshme përpara raundit të ardhshëm të kontakteve.