Ia kalon dhe Ramës? Reagimi EPIK i Giorgia Melonit kur takoi presidentin e Mozambikut (VIDEO)

Një moment i pazakontë gjatë një takimi zyrtar në Romë është bërë viral në rrjetet sociale, pasi kamerat kanë kapur reagimin e kryeministres italiane Giorgia Meloni në çastin kur ajo përshëndeti presidentin e Mozambikut, Daniel Chapo.

Takimi u zhvillua në selinë e qeverisë italiane, ku kontrasti në gjatësi mes dy liderëve ishte i pamundur të mos vihej re. Pamjet tregojnë momentin kur Meloni afrohet për t’i shtrënguar dorën presidentit Chapo, duke ngritur shikimin drejt tij dhe duke buzëqeshur, ndërsa diferenca e madhe në shtatlartësi bie menjëherë në sy.

Sipas mediave ndërkombëtare, Daniel Chapo, 48-vjeç, është rreth 204 centimetra i gjatë, ndërsa Giorgia Meloni ka një gjatësi rreth 158 centimetra. Diferenca e madhe në shtatlartësi ka bërë që fotografët të përballen me vështirësi për t’i futur të dy në të njëjtin kuadër, duke u detyruar në disa raste të ulen ose të shtrihen në dysheme për të realizuar fotografitë.

Pamjet dhe reagimi i kryeministres italiane u përhapën me shpejtësi në rrjetet sociale, ku përdorues të shumtë komentuan momentin, duke e konsideruar atë spontan dhe njerëzor.

Pavarësisht vëmendjes që mori ky episod, takimi mes dy liderëve ishte i fokusuar në çështje serioze, përfshirë bashkëpunimin ekonomik, energjinë dhe marrëdhëniet mes Italisë dhe vendeve afrikane, në kuadër të të ashtuquajturit “Plani Mattei për Afrikën”.

Daniel Chapo është presidenti i parë i Mozambikut i lindur pas shpalljes së pavarësisë së vendit. Ai mori detyrën më herët këtë vit, pasi fitoi zgjedhjet presidenciale me rreth 70 për qind të votave.