Atentati u transmetua live, Rusia kap të dyshuarin për atentatin ndaj gjeneralit të raketave bërthamore

Rusia ka arrestuar një person të dyshuar për vrasjen e gjeneralit Igor Kirillov, tha të mërkurën një zëdhënës i zyrës së prokurorit vendas. 

I dyshuari është një shtetas uzbek 29-vjeçar, emri i të cilit nuk bëhet i ditur.

Ai u arrestua në një fshat jashtë Moskës dhe, sipas autoriteteve ruse, rrëfeu se ishte rekrutuar nga inteligjenca ukrainase për të vrarë Kirillov (fakt i pakonfirmuar me burime te pavarura).

“Me udhëzimet e tyre, ai mbërriti në Moskë dhe iu dha një mjet shpërthyes i bërë vetë. Ai e vendosi atë në një skuter elektrik, të cilin e parkoi në hyrje të pallatit ku jetonte Igor Kirillov”, tha zëdhënësi i Komitetit Hetues Rus.

Sipas autoriteteve ruse, të dyshuarit iu ofrua një shpërblim prej 100,000 dollarësh dhe një udhëtim në një vend evropian.

Kirillov ishte në krye të forcave të mbrojtjes së armëve bërthamore, biologjike dhe kimike të ushtrisë ruse.

Shërbimi i Sigurisë së Ukrainës (SBU) mori përgjegjësinë për vrasjen e Kirillov, tha një zyrtar ukrainas i zbatimit të ligjit për POLITICO të martën.

Disa orë para sulmit, SBU akuzoi Kirillov në mungesë për urdhërimin e përdorimit masiv të armëve kimike të ndaluara kundër ushtrisë ukrainase në frontet lindore dhe jugore të fushëbetejës.

Një ndihmës i Kirillov u vra gjithashtu nga shpërthimi.

Në deklaratë thuhet se i dyshuari u tha hetuesve se kishte ardhur në Moskë për të kryer sulmin dhe se një kamera e montuar në pultin e një makine me qira të parkuar jashtë ndërtesës e kishte filmuar sulmin dhe e kishte transmetuar atë "drejtpërdrejt organizatorëve të sulmit, në qyteti (ukrainas) Dnipro”./lajmifundit.al