Tërmeti 6.2 ballë në Stamboll, reagon presidenti Erdogan!

Një tërmet me magnitudë 6.2 ballë i shkallës Rihter goditi Detin Marmara në brigjet e lagjes Silivri të Stambollit në mesditën e sotme, duke shkaktuar panik të gjerë jo vetëm në Stamboll, por edhe në qytete të tjera si Ankara dhe Sakarya. Epiqendra e tërmetit, sipas Departamentit të Tërmeteve të Presidencës së Fatkeqësive dhe Emergjencave (AFAD), ndodhej në det, pranë Silivrit.

Presidenti i Turqisë, Recep Tayyip Erdoğan, reagoi menjëherë pas lëkundjeve, duke shprehur solidaritetin e tij me qytetarët: “U përcjell qytetarëve tanë dëshirat e mia për një shërim të shpejtë. Po ndjekim nga afër zhvillimet”, tha ai në deklaratën e tij të parë publike të botuar nga CNN Turk.

Ministri i Transportit dhe Infrastrukturës, Abdulkadir Uraloğlu, bëri të ditur se inspektimet paraprake nuk kanë zbuluar dëme të dukshme në infrastrukturën kritike të vendit. “Gjatë inspektimeve tona fillestare, nuk u gjet asnjë dëmtim apo situatë emergjente në autostradat, aeroportet, trenat dhe metrotë tona”, u shpreh ministri.

Lëkundjet u ndjenë edhe në kryeqytetin Ankara, duke shkaktuar shqetësim në mesin e qytetarëve që dolën menjëherë jashtë ndërtesave për të kërkuar siguri.

Kryetari i Bashkisë Metropolitane të Ankarasë, Mansur Yavaş, reagoi përmes rrjeteve sociale duke thënë: “Tërmeti me magnitudë 6.2 që ndodhi në Stamboll u ndje edhe në Ankara. I uroj të gjithë të prekurit nga tërmeti, veçanërisht qytetarët tanë në Stamboll”.