Eksodi biblik i afganëve, më të varfrit kalojnë shkretëtirën për t'i shpëtuar talebanëve

Shumë afganë po përpiqen të largohen nga vendi i tyre për t'i shpëtuar të ardhmes që i pret me talebanët.

Imazhe tronditëse nga Afganistani po qarkullojnë në të gjithë botën, me turmat e refugjatëve duke u nisur drejt Perëndimit.

Imazhet e afganëve nëpër shkretëtirë, ku takohen kufijtë e Afganistanit e Pakistanit dhe Iranit, të kujtojnë eksodin e hebrenjve nga Egjipti dhe të ngjallin frikën e krizës së re të emigrimit në Evropë me BE-në që kërkon të punojë me fqinjët e Afganistanit për të frenuar rrjedhën.

Destinacioni fillestar i këtyre refugjatëve të varfër nga Afganistani ka shumë të ngjarë të jetë Turqia me kostot e transportit që arrijnë në 1500 dollarë për person dhe prej andej shumë prej tyre shpresojnë të arrijnë në Evropë.

Një nga bashkatdhetarët e tyre, të cilët kohët e fundit bënë të njëjtin udhëtim, tha se shkretëtira, e parë në pamjet e publikuara nga gazeta britanike “Daily Mail”, është pjesa e fundit e një udhëtimi të gjatë.

“Këta janë më të varfrit nga të gjithë, sepse ka rrugë të tjera që kërkojnë më pak ecje, por kushtojnë më shumë” tha ai.