Ekonomia e rrënuar, Draghi flet për rihapjen e vendit: Primare është përfundimi i vaksinimit

Një deklaratë është bërë nga kryeministri italian, lidhur me situatën e Covid-19 në vend dhe plani për rihapjen. Ai tha se qëllimi i vendit është rihapja sa më e shpejtë për turizmin vendas dhe të jashtëm, duke theksuar situatën ekonomike.

“Pandemia ka pasur efekte të mëdha ekonomike në operatorët e turizmit dhe ne po punojmë për t’i filluar sërish sa më shpejt të jetë e mundur dhe me sigurinë maksimale. Nisma e parë është përpjekja që qeveria bën për përfundimin e shpejtë të fushatës së vaksinimit”, tha ai.

Kryeministri shpjegoi se përsa i përket flukseve turistike, qeveria po planifikon të zgjerojë eksperimentimin e fluturimeve “të testuara për Covid”, që përfshin më shumë linja, më shumë itinerare dhe më shumë aeroporte.

Në lidhje me vendet e G7-s, në veçanti me SHBA-në, Japoninë dhe Kanadanë, do të favorizohet hyrja pa karantinë në rast të certifikimit të vaksinimit.

Në të kundërt, Draghi theksoi se do të ruhen të gjitha masat e nevojshme paraprake në lidhje me vendet ku ka përhapje të gjerë të COVID-19 dhe varianteve të tij më të rrezikshme.//ATSH