Cunami mbërrin në brigjet e SHBA/ Dallgë të ulëta në Kaliforni, Oregon dhe Uashington. Ulet rreziku për Hawaii-n

Cunami që u shkaktua pas tërmetit masiv në Japoni ka mbërritur në brigjet perëndimore të Shteteve të Bashkuara, duke prekur Kaliforninë, Oregonin dhe Uashingtonin. Deri më tani, valët e regjistruara kanë qenë relativisht të ulëta – më e madhja prej tyre arriti lartësinë e rreth gjysmë metri dhe u regjistrua në zona si Arena Cove, Crescent City dhe Monterey në Kaliforni. Paralajmërimi për cunam mbetet ende në fuqi për pjesën veriore të bregdetit kalifornian.

Ndërkohë, Qendra e Paralajmërimeve për Cuname në Paqësor ka njoftuar se niveli i alarmit për Hawaiin është ulur, duke shtuar se “më e keqja ka kaluar”. Para se situata të stabilizohej, valë deri në 1.7 metra u regjistruan në ishuj. Banorëve bregdetarë iu kërkua të largoheshin drejt zonave më të larta ose të qëndronin në katet e sipërme të ndërtesave, ndërsa Roja Bregdetare amerikane urdhëroi anijet të largoheshin nga portet.

Aeroporti i Honolulusë, i cili ishte pezulluar përkohësisht, ka rifilluar operimin, ndërkohë që aeroporti në Maui vijon të mbetet i mbyllur për shkak të situatës.