Burgosja e Belerit, Mitsotakis s’i del e keqja: Ka dëmtuar marrëdhëniet Greqi-Shqipëri

Kryeministri i Greqisë, Kyeriakos Mitsotakis ka deklaruar se çështja Beleri ka ‘turbulluar’ marrëdhënien mes dy shteteve. por mediat greke shkruajnë se tonet e kryeministrit në këtë rast ishin më të ulëta se herët e tjera.

 “Ne do të vazhdojmë të këmbëngulim për rastin Beleri dhe më vjen keq ta them, por mënyra se si u trajtua ka ndikuar negativisht në marrëdhëniet greko-shqiptare. Kjo është diçka që ne nuk e duam”,  tha Mitsotakis.

I pyetur në një intervistë, kreu i qeverisë greke nënvizoi se ende shpreson që çështja të zgjidhet.

 “Ne kemi shprehur rezervat tona të forta për faktin se ai nuk u lejua të betohet gjatë kohës që ishte në paraburgim, edhe nëse ishte një proces gjyqësor i drejtë. Do të vazhdojmë të këmbëngulim që nuk ka asnjë vendim përfundimtar, por një vendim të shkallës së parë. Shpresojmë se çështja do të zgjidhet”,  u shpreh kryeministri grek.

Qeveria Greke ka ndjekur me vëmendje dhe ka kritikuar ashpër palën shqiptare për rastin e Fredi Belerit që prej arrestimit të tij për blerje votash rreth një vite më parë.

Për këtë arsye Athina përdori veton për të bllokuar negociatat e anëtarësimit të Shqipërisë me BE në dhjetor, pavarësisht thirrjeve të ndërkombëtarëve se çështjet dy palëshe nuk duhet të bëheshin pengesë.

Vetëm pak ditë më parë kryeministri Rama përsëriti qëndrimin e tij se ‘Beleri’ i takon vetëm drejtësisë ndërsa kritikoi ndërhyrjet e të huajve.