27 viktima nga përmbysja e gomones në Kanalin Anglez, mes tyre edhe 5 gra

Bota

27 viktima nga përmbysja e gomones në Kanalin Anglez, mes tyre edhe 5

Një vajzë e re ishte në mesin e 27  personave që u mbytën në brigjet e Francës pas fundosjes së gomones teksa po transportonte emigrantë për në Britani, në një nga incidentet më vdekjeprurëse në Kanalin Anglez gjatë viteve të fundit, shkruan CNN

Ministri i Brendshëm francez Gérald Darmanin tha se pesë gra ishin në mesin e viktimave, dy persona arritën të shpëtonin, ndërsa një rezulton ende i zhdukur. Katër persona të dyshuar janë arrestuar tashmë, sipas Agence France-Presse.

Rruga e ngushtë ujore midis Britanisë dhe Francës është një nga korsitë më të ngarkuara të anijeve në botë. Refugjatët dhe emigrantët që largohen nga konflikti, persekutimi dhe varfëria në vendet më të varfra të botës ose të shkatërruara nga lufta rrezikojnë kalimin, shpesh në gomone të papërshtatshme për udhëtim dhe në mëshirën e kontrabandistëve të njerëzve, duke shpresuar për një jetë më të mirë.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

“Përgjegjësit kryesorë për këtë situatë të neveritshme janë kontrabandistët, domethënë kriminelët që për disa mijëra euro organizojnë trafikun e qenieve njerëzore nga Iraku, Afganistani, Afrika, Azia dhe që më pas i përdorin këta njerëz për t’i sjellë në Belgjikë, Holandë, Francë, veçanërisht për të kaluar Kanalin dhe për të shkuar në Britaninë e Madhe”, tha Darmanin.

Deri më tani, më shumë se 25,700 persona kanë kaluar Kanalin Anglez për në Mbretërinë e Bashkuar me varka të vogla, sipas të dhënave të përpiluara nga agjencia britanike e lajmeve PA Media – trefishi i totalit për të gjithë vitin 2020.

Vetëm të mërkurën, autoritetet franceze shpëtuan 106 njerëz që po kalonin me varka të ndryshme në Kanalin Anglez. Mbrëmjen e së mërkurës vonë, kryeministri britanik Boris Johnson tha se ishte “i tronditur dhe thellësisht i pikëlluar” nga lajmi se dhjetëra njerëz u mbytën në brigjet e Francës.

Presidenti francez Emmanuel Macron shtoi se Franca “nuk do të lejojë që Kanali të bëhet një varrezë”. Megjithatë mediat raportuan se rreth 25 varka kishin tentuar kalimin gjatë së mërkurës. Deri më tani raportohet se 31 persona janë mbytur por bilanci mund të rritet.

Macron tha se Franca kishte bashkëpunuar me Mbretërinë e Bashkuar për disa muaj për të shkatërruar rrjetet e kontrabandës.

“Që nga fillimi i vitit 2021, falë mobilizimit të 600 policëve dhe xhandarëve, në bregdetin verior janë arrestuar 1552 persona dhe janë shkatërruar 44 rrjete”, tha ai. “Pavarësisht këtij aksioni, që nga 1 janari janë bërë 47,000 tentativa për të kaluar në Britaninë e Madhe,  dhe 7,800 emigrantë janë shpëtuar nga ekipet tona të shpëtimit”

Kryeministri francez Jean Castex e përshkroi incidentin një “tragjedi”. Javën e kaluar, 243 persona u shpëtuan në Kanalin Anglez teksa po përpiqeshin të kalonin në Mbretërinë e Bashkuar.

Ndërkohë disa persona kanë protestuar në portin Calais të mërkurën në mbrëmje, me demonstruesit që bënin thirrje për trajtim më të mirë të emigrantëve.

Në një pankartë shkruhej: “30 vite njoftime, trajtim çnjerëzor dhe poshtërues”.abcnews

ME TE LEXUARAT