Nën hetim prindërit shqiptarë! Përndoqën të bijën sepse nuk pranonin lidhjen me të riun jo mysliman

Një 20-vjeçare me origjinë shqiptare në Rimini të Italisë u largua nga shtëpia për të jetuar me të dashurin e saj italian, por vendimi i saj u kthye në një makth.

Sipas mediave italiane, prindërit e saj shqiptarë, 44 dhe 47 vjeç, me origjinë nga Maqedonia e Veriut dhe pjesë e komunitetit mysliman, nuk e pranuan lidhjen sepse partneri i vajzës nuk ishte i besimit islam. Ata dyshohet se e përndoqën dhe e kërcënuan për muaj me radhë, derisa përfunduan nën akuzë nga autoritetet italiane për përndjekje dhe kërcënime.

Sipas mediave italiane, familja shqiptare jeton prej shumë vitesh në Rimini. Prindërit kishin vendosur rregulla të rrepta fetare në shtëpi dhe vajza ishte e detyruar t'u përmbahej kufizimeve për mënyrën e veshjes, shoqërinë dhe stilin e jetesës. Por gjithçka ndryshoi kur ajo u njoh me një bashkëmoshatar italian dhe mes tyre nisi një lidhje.

Fakti që i riu nuk ishte mysliman nuk u pranua nga prindërit e 20-vjeçares. Ata u përpoqën vazhdimisht ta bindnin vajzën t'i jepte fund marrëdhënies, por sa më shumë shtohej presioni, aq më shumë tensionoheshin marrëdhëniet në familje.

Pas një debati të fundit, e reja vendosi të largohej nga shtëpia. Ajo u transferua me nxitim në banesën e të dashurit, duke u përpjekur të mos linte asnjë gjurmë për vendndodhjen e saj. Prindërit nuk e dinin adresën ku jetonte çifti, por, sipas hetimeve, nisën të pyesnin të njohur dhe bashkëkombës derisa arritën ta zbulonin.

Pasi gjetën vendin ku jetonin dy të rinjtë, sipas dosjes hetimore, nisi një presion i përditshëm. Vajza merrte vazhdimisht mesazhe ku i kërkohej të kthehej në shtëpi, të shoqëruara me kërcënime që hetuesit i kanë konsideruar serioze.

"Mund të të gjej edhe sikur të shkosh në Hënë, sepse familjet shqiptare janë të gjitha të bashkuara", thuhej në një nga mesazhet. Në një tjetër shkruhej: "Nëse nuk kthehesh në shtëpi, do të kesh një jetë ferr."

Situata i shtyu dy të rinjtë t'i drejtoheshin Policisë së Riminit, ku bënë denoncimin e parë. Megjithatë, ngjarja nuk përfundoi aty.

Pak kohë më vonë, prindërit i dërguan vajzës një fotografi ku babai shfaqej në rrugën ku ndodhej banesa e çiftit. Për të rinjtë, ky ishte një sinjal i qartë se familja kishte zbuluar vendndodhjen e tyre dhe se mund t'i gjente në çdo moment. Pas këtij episodi ata paraqitën një denoncim të dytë dhe kërkuan që shefi i Policisë së Riminit të merrte masa ndaj prindërve, për t'i penguar që t'u afroheshin.

Sipas hetimeve, episodi më i rëndë ndodhi në maj të vitit 2026. Dy prindërit shkuan në banesën ku jetonte çifti dhe hynë pa leje brenda. Sipas mediave italiane, ata ishin gati t'i sulmonin me grushte dhe shkelma, por dy të rinjtë arritën të futeshin në një dhomë, u mbyllën me çelës dhe telefonuan policinë, duke shmangur përplasjen.

Ky episod u përfshi në dosjen hetimore dhe, sipas raportimeve, forcoi dyshimet e Prokurorisë së Riminit. Prokurori Davide Ercolani vendosi të procedojë penalisht dy prindërit, të cilët tashmë akuzohen në gjendje të lirë për përndjekje dhe kërcënime.

Sipas mediave italiane, hetimet vijojnë, ndërsa çifti i ri kërkon të jetojë i qetë, larg presioneve dhe kërcënimeve që, sipas denoncimit, kanë zgjatur për muaj me radhë.