1 vit pandemi botërore, 100,000 të vdekur në Itali nga Covid

Të paktën 100,000 të vdekur kanë mbetur në Itali, si pasojë e Covid-19, në një vit pandemi. Statistikat e publikuara sot tregojnë se kjo ka sjellë pasoja në demografinë e vendit.

 “Demografia e vendit tonë ka pësuar një ndryshim të madh për shkak të vdekjeve nga Covid-19. Në vitin 2020, numri i përgjithshëm i të vdekurve arriti në 746.146, numri më i lartë që nga Lufta e Dytë Botërore, me një rritje prej më shumë se 100,000 (+ 15,6%) krahasuar me mesataren e 2015-2019”, tha një deklaratë zyra kombëtare e statistikave italiane ISTAT.

Sipas Ministrisë Italiane të Shëndetësisë, numri i personave që vdiqën për shkak të Covid shkoi në 74,000 në 31 dhjetor të 2020. Italia është vendi i parë europian që u godit më rëndë nga pandemia 13 muaj më parë.

Sipas ISTAT, rajonet veriore janë më të prekurat. Në të njëjtën kohë, numri i lindjeve pësoi rënie (404.104 lindje,  -3.8% krahasuar me 2019). Numri i popullsisë italiane pësoi rënie me rreth 384,000 njerëz në 2020 krahasuar me 2019, “e njëjtë me zhdukjen e një  qyteti me madhësinë e Firences”. Më 31 dhjetor 2020, popullsia ishte 59,257,566 banorë, duke regjistruar një rënie prej 0.6% brenda 12 muajve.