Berisha MESAZH shqiptarëve: Nesër të gjithë në Tiranë, kanë mbushur komisariatet me fëmijë

Kryetari i Partisë Demokratike Sali Berisha u ka bërë thirrje qytetarëve, veçanërisht atyre demokratë, të vijnë nesër në Tiranë për të mbështetur protestën e studentëve.

Berisha ka denoncuar edhe dhunën e ushtruar nga policia gjatë këture katër ditëve, duke thënë se një barbari e tillë nuk është parë në Tiranë që prej viteve 1990.

Sipas Berishës, një numër i madh qytetarësh shqiptarë do të vijnë nga diaspora për të mbështetur protestat.

Mesazhi i plotë i Berishës:

Të dashur qytetarë dhe qytetare, vëllezër dhe motra, zonja dhe zotërinj, u drejtohem sonte para së gjithash si prind, si gjysh, si qytetar, por edhe ish-president e ish-kryeministër i këtij vendi.

Të gjithë ju, prindërve, qytetarëve dhe qytetareve, të gjithë anëtarëve të diasporës tonë kudo që janë, të rinjve dhe të rejave në të katër anët e vendit, nesër është një ditë shumë e rëndësishme, tejet e veçantë.

Që nga data 13 gjer sot, në rrugët dhe sheshet e Tiranës, narkobanditë me uniformë janë sjellë në mënyrën më shtazore me akte barbare ndaj studentëve dhe gjimnazistëve të Tiranës.

I kanë keqtrajtuar, torturuar, ndaluar dhe arrestuar me qindra e qindra prej tyre.

Kanë mbushur komisariatet me të mitur, me vajza, me qytetarë dhe të moshave më të shtyra.

Barbaritë e tyre mbi trupat e rrëzuar të të rinjve dhe studentëve, thyerja e kockave, çarja e kafkave me bombola gazi, me plumba gome, përdorimi i granatave të gazit dhe zhurmuese, përdorimi i tonelatave gaz të skaduar ariu, spraj ariu, shkopinjtë e gomës shoqëruar me shufra hekuri.

Tirana nuk ka njohur një barbari të tillë ndaj të rinjve shqiptarë as në vitet ’90.

Nesër gjimnazistët dhe studentët e Tiranës kanë më shumë se kurrë nevojë për mbështetjen e çdo shqiptari në betejën e tyre epike.

Në betejën e tyre të pamposhtur.