Zjarr në Sevaster të Vlorës, flakët të favorizuara nga era! Ndërhyrja e zjarrfikësve e vështirë nga terreni malor

Një vatër zjarri është aktivizuar mëngjesin e sotëm në fshatin Sevaster të Vlorës, ndërsa flakët janë përhapur me shpejtësi duke dëmtuar sipërfaqe të konsiderueshme me bimësi, pemë e shkurre.

Në vendin e ngjarjes ndodhen ekipet zjarrfikëse të Selenicës, ndërsa flakët po favorizohen nga temperaturat e larta dhe erërat e forta.

Ndërhyrja nga toka është shumë e vështirë pasi zjarri ka rënë në malin e Sevasterit dhe terreni është tepër i vështirë.

Deri më tani dyshohet se zjarret në të tilla zona janë të qëllimshme nga banorët vendas me qëllim hapjen e kullotave, duke krijuar situata alarmante dhe të rrezikshme në vend. Ndërkohë flakët rrezikojnë të prekin dhe një stan që ndodhet aty pranë.