Zbardhet dinamika e ngjarjes me një vik'timë në Shkodër, autori u konfliktua fillimisht me 24-vjeçarin në një lokal, më pas...

Të tjera detaje bëhen me dije në lidhje me ngjarjen e rëndë të ndodhur në orët e para të mëngjesit të së martës, 8 shtator, në Shkodër, ku 25-vjeçari Andri Vulaj plagosi 63-vjeçarin Qamil Luli dhe vrau të birin 24-vjeçar Ylber Luli.

Sipas informacioneve, dy të rinjtë, Ylber Luli dhe Andri Vulaj janë konfliktuar gjatë mbrëmjes në një lokal në zonën e Gjuhadolit. Më pas Andri Vulaj, rreth orës 05:00 të mëngjesit, i ka shkuar në banesë për t’u sqaruar duke mbajtur edhe një pistoletë me vete.

Në bisedë e sipër, Ylber Luli dhe Andri Vulaj janë përleshur me njëri tjetrin fizikisht ndërsa më pas është përfshirë edhe babai i viktimës Qamil Luli.

Sipas policisë, babë e bir kanë qëlluar me thikë Adri Vulajn, ndërsa ky i fundit ka nxjerrë armën dhe ka qëlluar në drejtim të tyre. Ata janë dërguar në spital, por 24-vjeçari nuk ka mundur që t’u mbijetojë plagëve të marra.

Sipas raportimeve, Ylber Luli është parë duke qëndruar deri në orët e vona jashtë banesës brenda makinës së tij bashkë me një person tjetër ndërsa rreth orës 2 pas mesnate është futur në banesë. Tri orë më pas, Andri Vulaj i ka shkuar në banesë dhe e ka qëlluar pas përplasjes fizike. Policia vendore e Shkodrës është duke hetuar për të bërë të mundur zbardhjen e plotë të kësaj ngjarje të rëndë.

Njoftimi i policisë:

Rreth orës 05:30, në lagjen “Kongresi i Përmetit”, Shkodër, dyshohet se, si pasojë e një konflikti për motive të dobëta, shtetasi A. V. ka plagosur me armë zjarri shtetasit Q. L., 63 vjeç, dhe Y. L., 24 vjeç (babë e bir), ndërsa këta të fundit dyshohet se kanë plagosur me mjet prerës (thikë) shtetasin A. V., 25 vjeç.

Si pasojë e plagëve të marra, shtetasi Y. L., 24 vjeç, ka ndërruar jetë në spital.

Shërbimet e Policisë kanë shkuar në vendngjarje, ku kanë bërë të mundur kapjen dhe shoqërimin e shtetasit A. V., si dhe gjetjen dhe sekuestrimin e armës së zjarrit, pistoletë, që dyshohet se është përdorur në ngjarje.

Grupi hetimor vijon veprimet për sqarimin e plotë të rrethanave të ngjarjes, përcaktimin e përgjegjësive dhe dokumentimin e plotë ligjor të saj.