Vinin baste sportive, dy të arrestuar në Astir e Kombinat, në kërkim pronari i lokalit

Hetimet e zhvilluara nga policia në disa lokale të Tiranës kundër basteve online kanë çuar në arrestimin e dy personave, shpalljen në kërkim të një tjetri dhe procedimin penal të disa shtetasve të tjerë.

Në zonën e Astirit u arrestua një 51-vjeçar, ndërsa në kërkim është shpallur pronari i lokalit ku dyshohet se zhvilloheshin baste sportive.

Ndërkohë, në Kombinat, në rrugën “Sabaudin Gabrani”, u vu në pranga një 44-vjeçar dhe u procedua penalisht pronari i ambientit ku organizoheshin lojëra fati.

Po në të njëjtën rrugë, në një tjetër ambient, policia vendosi nën hetim edhe dy persona të tjerë, një 56-vjeçar, pronar i lokalit, si dhe një 58-vjeçar, për të njëjtën vepër penale.

Gjatë operacionit janë sekuestruar telefona celularë që dyshohet se përdoreshin për aktivitetin e paligjshëm, ndërsa materialet procedurale i janë referuar Prokurorisë për veprime të mëtejshme.