Vidhte energjinë elektrike dhe nuk kishte regjistruar biznesin, në pranga punonjësi i OSHEE-së

Një punonjës i OSHEE-së në Tepelenë u arrestua nga policia për shpërdorim detyre pasi është kapur duke vjedhur energjinë elektrike dhe duke ushtruar aktivitet tregtar të paregjistruar në organet tatimore.

Bëhet fjalë për 61-vjeçarin Arben Shehu me profesion elektriçist pranë OSHEE-së në Tepelenë.

Policia njofton se gjatë kontrollit në banesën e tij, u konstatua lidhje e paligjshme e energjisë elektrike.

Gjithashtu u gjet një ambient në të cilin ai ushtronte aktivitet tregtar rrobaqepësi i paregjistruar në organet tatimore.

Njoftimi i policisë:

Shpërdoroi detyrën duke vjedhur energjinë elektrike dhe ushtronte aktivitet tregtar të paregjistruar në organet tatimore, vihet në pranga elektricisti.

Në vijim të punës për goditjen e paligjshmërisë, specialistët e Seksionit të Hetimit të Krimit Ekonomiko-Financiar në DVP Gjirokastër arrestuan në flagrancë shtetasin A. Sh., 61 vjeç, banues në Tepelenë, me detyrë punonjës i OSHEE Tepelenë.

Shtetasi A. Sh. u arrestua në flagrancë, pasi gjatë kontrollit të ushtruar në banesën e tij, u konstatua lidhje e paligjshme e energjisë elektrike, si dhe u gjet një ambient në të cilin ushtronte aktivitet tregtar (rrobaqepësi) të paregjistruar në organet tatimore.

Materialet në ngarkim të shtetasit A. Sh. i kaluan Prokurorisë Pranë Gjykatës së Shkallës së Parë Gjirokastër, për veprime të mëtejshme, për veprat penale “Shpërdorim i detyrës”, “Vjedhja e energjisë elektrike” dhe “Ushtrim aktiviteti i paregjistruar në organet tatimore”