U falsifikuan firmat, Gjykata e Lartë pezullon punimet për HEC-et në Valbonë

Aktualitet

U falsifikuan firmat, Gjykata e Lartë pezullon punimet për HEC-et

Gjykata e Lartë ka vendosur sot pranimin e padisë së 27 banorëve të Dragobisë dhe shoqatës TOKA në lidhje me dokumentin me firma të falsifikuara për ndërtimin e hidrocentraleve nga Dragobia Energy dhe Gener 2 në Parkun Kombëtar të Valbonës. 

Trupi gjykues i Kolegjit Administrativ i përbërë nga Sokol Sadushi, Ilir Panda, Sokol Binaj vendosi në dhomë këshillimi pezullimin e kontratës së koncesionit dhe shtesave të saj dhe lejeve të përmendura në pikat 3-6 të objektit të kërkesëpadisë, deri në zgjidhjen përfundimtare të cështjes me vendim të formës së prerë.

Çështja e listës së emrave të falsifikuar ka nisur që në vitin 2016, kur kompania ndërtuese e hidrocentraleve paraqiti si dëshmi për të justifikuar ndërtimin e hidrocentraleve një listë me emra të banorëve të cilët ishin pro ndërtimit.

Merr lajme ekskluzive në Viber

Doni të informoheni të parët për lajme ekskluzive? Bashkohuni me grupin tonë në Viber duke klikuar këtu.

Banorët denoncuan falsifikimin e procesverbaleve të konsultimit me publikun. Sipas këtij procesverbali banorët ishin dakord për ndërtimin e HEC-eve, por ata e kundërshtojnë këtë pohim. Në listën e personave që kishin firmosur u vu re se kishte edhe individë të cilët kishin vdekur më herët se sa mbajtja e procesverbalit, ashtu sikundër kishte të tjerë që e mohonin se kishin qenë të pranishëm për të firmosur.

Banorët dhe shoqata TOKA vendosën ta dërgojnë këtë çështje në gjykatë. Padia u krye në Gjykatën e Tropojës, e më pas në Gjykatën e Apelit në Shkodër, por të dyja këto Gjykata nuk morën përsipër që të jepnin një vendim për çështjen. Gjykata e Tropojës e dërgoi çështjen në gjykatën e Tiranës, por edhe Gjykata e Tiranës nuk e mori përsipër.

Në mars të vitit 2018, shoqata Toka dhe 30 banorë ngritën padi penale kundër kryeplakut Adem Metaliaj dhe administratorit “DE”, Artila Ulaj, pasi kanë konfirmuar se “nënshkrimet “ e të vdekurve ishin të vlefshme dhe këta njerëz kishin marrë pjesë në konsultimet publike.

ME TE LEXUARAT