"Na u dogjën të gjitha"/ Situatë alarmante në Fier, nis evakuimi i banorëve: Me çanta në krahë e të përlotur (VIDEO)

Zjarri në Levan të Fierit ka marrë përmasa të frikshme dhe përveç dëmeve materiale, banorët shprehen se është djegur edhe një fermë me lopë.

Në një prononcim për Top Channel kanë folur dy banorë të zonës. Një prej tyre, dukshëm i mërzitur, shprehet se i është djegur shtëpia.

“Kaluan flakët. Na dogjën. U dogj shtëpi e të gjitha. Jemi dy veta në familje. Nuk e dimë nga erdhi zjarri”, shprehet një nga banorët.

“Frynte erë shumë. Nuk kishte kush e fikte, ne këtu në Levan nuk kemi as ujë. Ishte vetëm një helikopter, bënë punë, por ishin pak. Tani rrezikohen banesa të tjera. Është çmenduri, nuk pyet njeri për ullinjtë.

U dogj shtëpia, iu dogjën lopët atje lart, u dogj ferma. Nuk ka ndodhur ndonjëherë si sot”, deklaron një tjetër banor.

Për shkak se situata po rëndohet gjithmonë e më shumë kanë nisur evakuimet e banorëve, të cilët largohen të përlotur dhe duke marrë vetëm pak gjëra me vete. Ata lënë pas gjithçka, me shpresën se kur të kthehen do i gjejnë përsëri aty.