Të tjera detaje nga vrasja në Tiranë/ Hysni Patushi qëlloi bashkëshorten sepse kujdesej për nipërit e saj

Detaje të reja kanë dalë në dritë në lidhje me me vrasjen e 58-vjeçares Lumturi Patushi nga bashkëshorti i saj, Hysni Patushi.

Hetimet e deritanishme tregojnë se shkak për përplasjet e vazhdueshme mes çiftit ishte bërë mungesa e 58-vjeçares në shtëpinë e tyre, pasi ajo kalonte pjesën më të madhe të kohës në banesën e vajzës për të u kujdesur për katër nipërit e saj të mitur.

Ditën e ngjarjes, 68-vjeçari, i cili dyshohet se kishte konsumuar alkool, është nisur nga banesa e tyre në zonën e "Don Boskos" dhe ka shkuar në apartamentin e vajzës në "Rrugën Panorama".

Krimi i rëndë ndodhi në prani të nipërve të mitur, ku pas një debati të çastit, ai e goditi bashkëshorten me thikë për vdekje dhe më pas u largua duke e hedhur armën e krimit jashtë pallatit.

Pas ngjarjes, autori ka shkuar në Kamëz te një i afërm i tij, i cili e ka bindur të vetëdorëzohet në polici.

Gjatë marrjes në pyetje, Hysni Patushi ka pranuar autorësinë e ngjarjes dhe ka pretenduar se përshkallëzimi i konfliktit erdhi edhe si pasojë e efektit të alkoolit, ndërsa hetuesit arritën të gjejnë thikën e përdorur përmes këqyrjes së kamerave të sigurisë.

Kjo ngjarje pason një histori të mëparshme dhune në familje, pasi autori kishte qenë i arrestuar edhe në vitin 2017 për dhunë ndaj bashkëshortes së tij, me të cilën kishte shtatë fëmijë.