Spiropali: Gjetëm dakordësi të shpejtë me Rithemelimin, prej të enjtes seancat do të jenë "normale"

Ministrja e Shtetit për Marrëdhëniet me Parlamentin, Elisa Spiropali në përfundim të mbledhjes së Konferencës së Kryetarëve foli për finalizimin e negociatave me Rithemelimin duke sjellë ngritjen e dy komisioneve hetimore.

Spiropali përgëzoi deputetët e opozitës duke thënë se prej të enjtes seancat në kuvend do të jenë të plota dhe transparente.

“Lajm i mirë. I jemi kthyer normalitetit në Kuvend. I përgëzoj deputetët e opozitës.

Gjetëm një dakordësi të shpejtë për komisionet hetimore dhe dialogun që kërkon shumicë të cilësuar. 

Të enjten seancat do të jenë më të plota më transparente dhe qeveria është e gatshme që të gjithat që janë në parlament ti diskutojë dhe debatojë me opozitën.” tha Spiropali.

Kur u pyet nëse do të bashkojnë deputetët e Rithemelimit votat për amnistinë, Spiropali tha: 

Ne nuk kemi bërë asnjë marrëveshje. Do ta diskutojmë edhe këtë dhe shpresoj që deputetët e opozitës do ta votojnë.