Shtyhet seanca në GJKKO për ish-ministrin e Shëndetësisë Ilir Beqaj

Është shtyrë sërish seanca gjyqësore për ish-ministrin e Shëndetësisë, Ilir Beqaj, ish-zv.ministrin Klodian Rjepaj, biznesmenin Ilir Rrapaj dhe 6 të zyrtarë të tjerë, të cilët janë nën hetim për koncesionin e ‘Sterilizimit’.

Seanca e radhës në GJKKO do të zhvillohet në datën 26 korrik. Ish-ministri i Shëndetësisë Ilir Beqaj kërkoi kohë për t’u njohur me aktet. Seanca e kësaj të hënë parashikonte vendimmarrjen e GJKKO për të pranuar ose jo kalimin për gjykim të dosjes.

Kujtojmë që Gjykata e Posaçme ka urdhëruar SPAK-un që t’u vërë në dispozicion 9 të pandehurve fashikujt në mënyre elektronike pa pagesë të dosjes së koncesionit të “Sterilizimit”. Vendimi u dha nga gjyqtarja Flojera Davidhi për shkak se ish-ministri i Shëndetësisë Ilir Beqaj refuzoi të kryente pagesën prej 10 milionë lekësh.

Të pandehur në këtë proces janë 9 persona, dy prej tyre të lënë në masën “arrest në burg”. Konkretisht ish zëvendësministri i shëndetësisë Klodjan Rjepaj dhe biznesmeni Ilir Rrapaj. Dy të tjerë janë lënë në masën “arrest në shtëpi”, ndërsa 5 personat e tjerë në mesin e të cilëve ish ministri i shëndetësisë Ilir Beqaj janë në masën “detyrim paraqitje”.

Mbi 9 të pandehurit rëndojnë akuzat “Shpërdorim detyre”, “Mashtrim”, “Falsifikim i dokumentave”.