Shpërthimi i fuqishëm “zgjon” Tiranën, hidhet në erë një zyrë noterie në ish-bllok

Një shpërthim me tritol ka tronditur mëngjesin e kësaj të marte (30 janar) Tiranën. Mësohet se objektivi i hedhjes në erë ka qenë një zyrë noterie në zonën e ish-bllokut.

Ngjarja ka ndodhur rreth orës 04:00 në një zyrë noterie. Burime nga policia bëjnë të ditur se lënda plasëse ishte vendosur në derën e zyrës së noterisë.

Për fat të mirë nuk raportohet për dëme në njerëz, por vetëm dëme materiale.

Nuk dihen ende rrethanat, ndërsa policia po punon për zbardhjen e ngjarjes.

"Më datë 30.01.2024, rreth orës 04:10, është marrë njoftim se në rrugën “Perlat Rexhepi”, në ambientet e jashtme të një noterie, dyshohet se ka shpërthyer lëndë plasëse, dhe si pasojë ka vetëm dëme materiale. Grupi hetimor po punon për sqarimin e rrethanave të ngjarjes, identifikimin dhe kapjen e autorit/eve.", njofton policia.