Shoqëria civile kërkon reformë të thellë për zgjedhjet, thelbësor depolitizimi i administratës zgjedhore

Në një raport të Komitetit Shqiptar të Helsinkit dhe Qëndresës Qytetare theksohet se sistemi aktual elektoral vazhdon të përballet me probleme strukturore si politizimi i administratës zgjedhore, përdorimi i burimeve publike për qëllime elektorale dhe ndëshkueshmëria e ulët për shkeljet zgjedhore.

Ndër rekomandimet kryesore të raportit është depolitizimi i administratës zgjedhore, përmes krijimit të një trupe të përhershme komisionerësh të certifikuar dhe të përzgjedhur mbi bazë meritash, duke reduktuar ndikimin e partive politike në komisionet e administrimit të zgjedhjeve.

Përfaqësuesit e Ambasadës Britanike në Tiranë apeluan palët politike se reforma e re duhet të jetë gjithëpërfshirëse.

Të tjera organizata të Shoqërisë civile theksuan nevojën për një reformë reale dhe jo një arnim i Kodit Aktual.

Sa i përket hetimeve për krimet zgjedhore, organet e prokurorisë kërkojnë zgjatjen e afateve kohore.

Raporti thekson gjithashtu nevojën për mbrojtje më të fortë për sinjalizuesit e shkeljeve zgjedhore, duke propozuar që mbrojtja ligjore të shtrihet jo vetëm për personat që denoncojnë shkeljet, por edhe për familjarët dhe bashkëpunëtorët e tyre.

Ndër rekomandimet e tjera përfshihen garantimi i barazisë së subjekteve politike në media, përmirësimi i funksionimit të Kolegjit Zgjedhor, rregullimi më i qartë i votës së diasporës dhe forcimi i hetimit të krimeve zgjedhore, përmes bashkëpunimit më të ngushtë mes KQZ-së, prokurorive dhe institucioneve ligjzbatuese./Shqiptarja