Shiste kokainë në doza, arrestohet në flagrancë 27-vjeçari nga Divjaka

Policia ka arrestuar një 27-vjeçar, Lulzim Hoxha, pasi siguronte dhe shpërndante kokainë dhe cannabis në qytetin e Divjakës.

Operacioni policor i koduar “Kontaktet” u finalizua nga Seksioni për Hetimin e Narkotikëve të DVP Fier, në bashkëpunim me Seksionin për Mbështetje Operacionale të Hetimit dhe shërbimet e Komisariatit të Policisë Divjakë.

Gjatë kontrollit në banesën e Hoxhës, janë sekuestruar 142 gramë kokainë, 205 gramë cannabis sativa, dhjetra doza gati për shitje, pajisje për ndarjen e lëndëve narkotike, shuma parash, 6 celularë dhe një automjet. Hoxha u arrestua për veprat penale të “Prodhimit dhe shitjes së lëndëve narkotike” dhe materialet janë dërguar për veprime të mëtejshme në Prokurorinë e Fierit.