Rama: “Jemi për ibret! Shqipëria prodhon doktorë berberë”

Kryeministri Edi Rama ka goditur fort sistemin e arsimit të lartë në vend, duke i cilësuar rezultatet e tij si të mjerueshme dhe plot mangësi. Në një fjalim ku nuk munguan ironitë dhe kritikat e drejtpërdrejta, ai ngriti alarmin për nivelin e ulët të kërkimit shkencor, mungesën e standardeve në mbledhjen e të dhënave, dhe plagjiaturën e shfrenuar që sipas tij ka çuar në “doktoratura kot”.

“Tani ka filluar me gjasë që ca gjëra janë më në vijë, por edhe sot që flasim i kemi në proces këta doktorë të ardhshëm. Shpresoj të jenë doktorë, jo berberë!”, u shpreh Rama, duke vënë në dyshim seriozitetin dhe vlerën e titujve shkencorë që jepen sot në universitetet shqiptare.

Ai shtoi se Shqipëria renditet në fund të tabelës krahasuar me vendet e Bashkimit Europian, sa i takon mbledhjes dhe administrimit të të dhënave. “Jemi për ibret! Të gjithë bashkë në nivelin më të ulët të mundshëm. Mos u ndjeni fare të vetëm, as të fyer, jeni ibret!”, theksoi ai, pa kursyer askënd.

Sa i përket kërkimit shkencor, kryeministri e përshkroi gjendjen si “në fazën e bebëzimit”, duke e cilësuar mungesën e zhvillimit dhe të investimit në këtë fushë si alarmante. Megjithatë, ai falënderoi ata që e trajtojnë me pasion dhe ndershmëri çështjen, duke kërkuar një qasje të re dhe më të përgjegjshme për të ardhmen e arsimit të lartë në vend.