"Ra nga 10 metra lartësi", policia sqaron rrethanat si humbi jetën Arben Tafaj, ish-kandidat i PD për deputet

Ish-kandidati i PD për deputet Arben Tafaj, ish kryetar i Shoqates Tirana, personalitet i njohur, ndërroi jetë tragjikisht rreth orës 00:40, në Rrugën e Dajtit pasi aksidentalisht ka rënë nga 10 metra lartësi.

63-vjeçari nga plagët e marra nga rënia nuk ka mundur të mbijetojë.

Ne lidhje me ngjarjen, reagoi edhe policia, permes nje deklarate per media ku thekson se Tafaj ka rene nga lartesia ne banesen e tij.

Njoftimi i policise:

“Më datë 03.12.2024, rreth orës 00:40, në Rrugën e Dajtit, dyshohet se duke qenë në gjendje të dehur, aksidentalisht është rrëzuar nga një lartësi rreth 10 metra, në banesën e tij, shtetasi A. T., 63 vjeç. Si pasojë e dëmtimeve të marra ky shtetas ka ndërruar jetë në spital”, sipas njoftimit të policisë.

Ne lidhje me ngjarjen kane reaguar personalitete te njohura ne vend:

Kryebashkiaku Erion Veliaj:

I hidhëruar për lajmin e ndarjes nga jeta të anëtarit të Këshillit Bashkiak të Tiranës, Arben Tafaj, kryetar i shoqatës “Tirana” dhe një nga zërat më të zëshëm për komunitetin tonë, me zemër të madhe e mik i vyer për shumë njerëz që e njohën.

Ikja e Arbenit është një humbje e madhe jo vetëm për familjen dhe miqtë, por për të gjithë qytetin e Tiranës. Ngushëllime të sinqerta familjes Tafaj dhe të afërmve të tij!

Lulzim Basha: 

Pikëllues lajmi për ndarjen e parakohshme nga jeta të Arben Tafajt, politikan dhe kontributor i palodhur në shërbim të Tiranës, komunitetit dhe traditës së kryeqytetit, që e deshi fort dhe e promovoi me çdo ditë të punës së tij.
Në këto momente të vështira, mendimet dhe lutjet e mia shkojnë për familjen, miqtë dhe bashkëpunëtorët e shumtë. U gjendem pranë në këtë humbje të madhe dhe u them se duhet të ndihen krenarë për kujtimin dhe trashëgiminë që la pas Arbeni. U prehtë në paqe!

Jorida TABAKU:

Me hidhërim të thellë mësova lajmin e ndarjes së parakohshme nga jeta të Arben Tafajt.

Një lajm i trishtë pasi ai ishte një shembull frymëzues për përkushtimin dhe dashurinë e tij për Tiranën dhe Shqipërinë. Me zemër të madhe, punoi pandërprerë për ta ruajtur dhe ngritur lart emrin e qytetit tonë, duke mos kursyer asgjë për të promovuar historinë dhe të ardhmen e saj.

Largimi i tij është një humbje e madhe jo vetëm për familjen dhe të dashurit e tij, por për të gjithë ata që patën fatin ta njohin dhe të bashkëpunojnë me të.

Do ta mbaj mend të gëzuar e të qeshur, ashtu si ishte kur ma mblidhte në sofrën e madhe tironse, duke përcjellë gjithmonë dashuri dhe ngrohtësi.
Ngushëllime të sinqerta familjes dhe të afërmve në këtë moment kaq të vështirë. Qoftë shpirti i tij i qetë dhe emri i tij i paharruar!
Zoti ju dhëntë forcë dhe durim për të përballuar këtë dhimbje!