Po transportonte 8 emigrantë të paligjshëm drejt vendeve të BE-së, arrestohet 31-vjeçari në Lezhë

Një 31-vjeçar është arrestuar nga policia pasi është kapur duke transportuar 8 emigrantë të paligjshëm të cilëve iu kishte premtuar kalimin drejt vendeve të BE-së, kundrejt pagesës dhe një tjetër është shpallur në kërkim.

Policia ka prangosur shtetasit E. P., 31 vjeç, banues në Kamzë, Tiranë, si dhe u bë shpallja në kërkim policor e shtetasit F. D., 18 vjeç, banues në Kukës.

Shtetasi E. P. është kapur në kushtet e flagrancës në Autostradën Milot- Morinë, në Skuraj, Kurbin, duke transportuar me automjetin tip “Volkswagen”, të marrë me qira nga shtetasi F. D., 8 emigrantë të paligjshëm, të cilëve iu kishin premtuar kalimin drejt vendeve të BE-së, kundrejt pagesës.

Materialet i kaluan Prokurorisë pranë Gjykatës së Shkallës së Parë Kurbin, për veprime të mëtejshme procedurale, për veprën penale “Ndihma për kalim të paligjshëm të kufijve”, e kryer në bashkëpunim.