Plagosi pronarin e një dyqani dhe vajzën e tij për xhiron ditore, arrestohet shqiptari në Itali

Një 49-vjeçar shqiptar është arrestuar në Milano me akuzën e vrasjes në tentativë, vjedhje të rëndë dhe armëmbajtje pa leje.

Ai u arrestua pasi qëlloi me armë zjarri dhe plagosi pronarin e një tabakoje dhe vajzën e tij, gjatë një grabitjeje.

Sulmi ndodhi më 4 maj në via Costantino Baroni, kur i dyshuari tentoi të vidhte të ardhurat dhe biletat e shumta gërvishtëse.

Pasi i plagosi viktimat, ai arriti të merrte bileta me vlerë rreth 15 mijë euro. Në një episod të dytë, që ndodhi më 6 maj, ai tentoi të grabiste një dyqan ushqimesh po i armatosur me armë, por dështoi.

Falë hetimeve të Policisë së Shtetit, i dyshuari u arrestua me shpejtësi. Provat e mbledhura përfshijnë gjurmë papilare të gjetura në derën e dyqanit të duhanit dhe që i atribuohen burrit.

Gjatë arrestimit, atij iu gjet një pistoletë gjysmë automatike, gëzhoja dhe një thikë, si dhe veshje të veshura gjatë grabitjeve, të fshehura brenda pakove.