Padi për abuzim me fondet e Covid-19, SPAK nis hetimet për ministren Ogerta Manastirliu

Prokuroria e Posacme, SPAK, ka regjistruar procedim penal ndaj ish-ministres së Shëndetësisë, aktualisht Ministre e Arsimit dhe Sportit, Ogerta Manastirliu.

Procedimi mban numrin 81, të vitit 2024 për veprën penale “Shpërdorim detyre”, sic njoftuan mediat.

Ky procedim është regjistruar pas kallëzimit të bërë nga deputetja e PD, Albana Vokshi në vitin 2020, për keqmenaxhimin dhe abuzimin me fondet e COVID-19, kohë në të cilën Manastirliu drejtonte Ministrinë e Shëndetësisë.

Sipas kallëzimit të bërë nga Albana Vokshi aso kohe, pretendohet se Manastirliu ka bërë tendera sekretë gjatë kohës që ishte ministre e shëndetësisë.

SPAK po kryen veprime hetimore për Manastirliun, e cila në muajin shkurt u thirr në Prokurorinë e Posaccme për tu marrë në pyetje, për një cështje që ajo e cilësoi sekret hetimor.

Pak javë më parë, Vokshi ka bërë një kallëzim shtesë për Manastirliun, duke shtuar në të, prova për tendera.

Më 19 shkurt, Ogerta Manastirliu u thirr në SPAK ku dëshmoi për mbi 2 orë para oficerëve të BKH-së dhe në prononcimin për mediat deklaroi shkurtimisht se ishte thirrur në SPAK në cilësinë e personit që ka dijeni mbi çështjen e sterilizimit në kohën kur ka drejtuar Qendrën Spitalore Universitare Nënë Tereza (QSUT).