Nuk evidentuan vjedhjen e energjisë nga bizneset që kishin në ngarkim, arrestohen tre punonjësit e OSHEE-së në Lezhë

LEZHË
Policia e Lezhës ka finalizuar me sukses operacionin e koduar “Faturisti”. Pas një hetimi 6 mujor, në pranga kanë rënë tre shtetas, të cilat akuzohen për veprën penale “Falsifikimi i dokumenteve”.

Të arrestuarit janë shtetasit E. A., 33 vjeç; V. D., 62 vjeç dhe K. Z., 61 vjeç, me profesion ish-elektricistë të OSHEE.

Këta të fundit, dyshohet se gjatë kontrolleve rutinë nëpër biznese, nuk kanë evidentuar vjedhjen e energjisë që bëhej prej tyre.

Materialet hetimore iu referuan Prokurorisë së Rrethit Gjyqësor Lezhë, për veprime të mëtejshme, për veprën penale “Falsifikimi i dokumenteve “.

Njoftimi i plotë i Policisë:
Lezhë

Finalizohet operacioni policor “Faturisti”.

Operacioni nga Seksioni për Hetimin e Krimit Ekonomik dhe Financiar në Drejtorinë Vendore të Policisë Lezhë, nën drejtimin e Prokurorisë së Rrethit Gjyqësor Lezhë, pas një hetimi 6-mujor.

Ekzekutohen masat e sigurisë për 3 shtetas, për veprën penale “Falsifikimi i dokumenteve”.

Specialistët për Hetimin e Krimit Ekonomik e Financiar në DVP Lezhë, në vijim të punës për evidentimin dhe goditjen e paligjshmërisë, pas një hetimi 6-mujor, finalizuan operacionin “Faturisti”, në kuadër të të cilit u godit një rast i falsifikimit të dokumenteve.

Si rezultat i këtij operacioni u bë ekzekutimi i masës së sigurisë “Arrest në burg” për shtetasin E. A., 33 vjeç, banues në Shkodër, me detyrë ish-inspektor pranë një kompanie private në Shkodër, si dhe “Pezullim i ushtrimit të një detyre ose funksioni publik”, për shtetasit V. D., 62 vjeç dhe K. Z., 61 vjeç, banues në Lezhë, më detyrë ish-elektricistë pranë OSHEE Lezhë.

Specialistët e Hetimit të Krimit Ekonomik e Financiar pranë DVP Lezhë kanë zhvilluar hetimet mbi bazën e informacioneve të siguruara në rrugë operative se shtetasit E. A., V. D. dhe K. Z., gjatë ushtrimit të detyrës së tyre kanë falsifikuar formularët e raportit të verifikimeve të matësve elektrik në subjekte të ndryshme private ku kanë kryer inspektime, duke mos evidentuar vjedhjen e energjisë elektrike nga këto subjekte.

Materialet hetimore iu referuan Prokurorisë së Rrethit Gjyqësor Lezhë, për veprime të mëtejshme, për veprën penale “Falsifikimi i dokumenteve “.