Nisma e re, prona e konfiskuar në rrethinat e Tiranës shndërrohet në strehëz për kafshët e braktisura

Agjencia për Administrimin e Pasurive të Sekuestruara dhe të Konfiskuara (AAPSK) po ndërmerr një nismë të re për t’i dhënë një funksion social një pasurie të konfiskuar, këtë herë në mbështetje të organizatave që kujdesen për kafshët e braktisura.

Bëhet fjalë për një sipërfaqe toke prej rreth 7 mijë metrash katrorë në rrethinat e Tiranës, e cila synohet të vihet në dispozicion të organizatave që veprojnë në fushën e mbrojtjes dhe kujdesit ndaj kafshëve.

Qëllimi është që prona e konfiskuar të mund të shfrytëzohet për krijimin dhe zhvillimin e strehëzave për kafshët e braktisura, duke krijuar më shumë hapësira për sistemimin, trajtimin dhe mbrojtjen e tyre.

Nisma ka nisur të tërheqë interesin e organizatave të fushës. Deri tani, një organizatë ka shprehur konkretisht interes për të përfituar nga kjo mundësi, ndërsa disa organizata të tjera kanë kërkuar informacion të mëtejshëm mbi pronën, kushtet dhe mënyrën se si do të zbatohet iniciativa.

Nisma u bë publike edhe gjatë një vizite në një prej strehëzave të kafshëve në Tiranë, ku u evidentuan nga afër nevojat dhe vështirësitë me të cilat përballen çdo ditë organizatat dhe personat që kujdesen për kafshët e braktisura.

“Shumë shpejt, me mbështetjen e Agjencisë për Administrimin e Pasurive të Sekuestruara dhe të Konfiskuara, një hapësirë e re do të hapë dyert për më shumë kafshë në nevojë”, thuhet në komunikimin për nismën.

Vënia në dispozicion e kësaj sipërfaqeje synon të jetë një tjetër rast i ripërdorimit social të pasurive të konfiskuara, duke i orientuar ato drejt aktiviteteve me interes publik. Në këtë rast, një pronë e kaluar nën administrimin e shtetit mund të shndërrohet në një hapësirë që u shërben organizatave të mbrojtjes së kafshëve dhe, në mënyrë të drejtpërdrejtë, kafshëve të braktisura.

AAPSK pritet të vijojë komunikimin me organizatat e interesuara për të përcaktuar mënyrën konkrete të vënies në përdorim të pronës dhe zhvillimit të projektit.