Ngërçi i pagave/ Bojkotohet puna në Gjykatën e Tiranës, administrata bllokon shërbimet dhe seancat gjyqësore

Tanushe Bakollari, sanitare prej 24 vitesh në Gjykatën e Tiranës, nuk e ka marrë ende pagën e muajit gusht. Si gjithë administrata gjyqësore, dhjetëra sekretarë dhe ftues, Bakollari po vuan pasojat e përplasjes së dy pushteteve, ekzekutivit me gjyqësorin. Durimi i tyre përfundoi këtë të martë. Administrata e Gjykatës së Tiranës dhe të Apelit për pak orë braktisën punën.

Drejtësia i ka mbyllur për pak çaste dyert, duke mos ofruar shërbime si marrje vërtetimesh, raporton Anila Hoxha. Euro Rrasës i duhej një vërtetim, edhe ai, si qytetarë të tjerë, gjendet në mes të dy pushteteve.

Kur KLGJ dhe KLP kanë aprovuar formulën e pagave të reja në drejtësi, Ministria e Drejtësisë deklaroi se situata zgjidhet vetëm përmes Kuvendit, me miratimin e një ligji të ri. Sakaq, deri në tejkalimin e krizës, Ministria e Financave u ka kërkuar këshillave që të përcjellin listëpagesat sipas buxheteve të miratuara më herët.

Pagat e vjetra për gushtin i kanë marrë vetëm Kushtetuesja dhe SPAK, por prokurorët e posaçëm kanë vendosur që në vijim të respektohet vendimi i Gjykatës Kushtetuese dhe pagat të kalkulohen sipas formulës së re.

Në përfundim të një mbledhjeje urgjente me Prokurorin e Përgjithshëm, Olsian Çela, kanë dalë edhe kryeprokurorët e rretheve, duke kërkuar zgjidhje të shpejtë të situatës, sipas Gjykatës Kushtetuese.

Në njoftimin zyrtar, Prokuroria e Përgjithshme deklaron se është dakordësuar për trajtimin e çështjes sipas ligjit, duke garantuar pavarësinë dhe funksionimin e drejtësisë./Top Channel